اسٹیل ملز کرپشن کیس : رحمان ملک کو توہین عدالت کا نوٹس

اسٹیل ملز کرپشن کیس : رحمان ملک کو توہین عدالت کا نوٹس

 

اسلام آباد(سی ایم لنکس) سپریم کورٹ نے اسٹیل مل کرپشن از خود نوٹس کیس کا فیصلہ سناتے ہوئے مقدمے کی تفتیش ایف آئی اے سے واپس لے کر نیب کے حوالے کر دی ہے اور رحمان ملک کو توہین عدالت کا نوٹس جاری کرتے ہوئے دو ہفتے میں جواب طلب کر لیا ہے۔سپریم کورٹ نے ستمبر دو ہزار نو میں اسٹیل مل میں بائیس ارب روپے کی کرپشن کا از خود نوٹس لیا تھا، چیف جسٹس کی سربراہی میں سپریم کورٹ کے تین رکنی بنچ نے سماعت کرتے ہوئے پندرہ مارچ دوہزار بارہ کو فیصلہ محفوظ کر لیا تھا جو آج جاری کردیا گیا،فیصلہ جسٹس طارق پرویز نے تحریر کیا ہے،عدالت نے کیس میں ایف آئی اے کی تفتیش پر عدم اطمینان کا اظہار کرتے ہوئے تحقیقات نیب کے سپرد کردی ہیں اور ایف آئی اے کو ہدایت کی ہے کہ مقدمے کا تمام ریکارڈ نیب کے حوالے کردیا جائے، نیب کو تین ماہ میں تحقیقات مکمل کرنے اور ہر پندرہ روز بعد پیشرفت رپورٹ پیش کرنے کا حکم دیا ہے ، سپریم کورٹ نے نیب کو ملوث افراد کی ضمانتیں منسوخ کرانے کے لئے متعلقہ عدالتوں سے رجوع کرنے کی بھی ہدایت کی ہے۔ اسٹیل ملز کیس میں دس مقدمات درج ہوئے تھے، سابق چئیرمین معین آفتاب اس کیس میں ابھی تک گرفتار ہیں، علالت کے باعث انہیں جیل کے بجائے اسپتال میں رکھا گیا ہے،جبکہ نامزد ملزمان میں سے تین افراد ضمات پر رہا ہیں،فیصلے میں کیس کی تفتیش تبدیل کرنے اور عدالتی حکم کی عدم پیروی پر وزیر داخلہ رحمن ملک کو بھی توہین عدالت کا نوٹس جاری کرتے ہوئے دوہفتوں میں جواب طلب کیا گیا ہے ،فیصلے میں کہا گیا ہے کہ رحمن ملک کا اقدام عدالتی کارروائی میں مداخلت کے مترادف تھا،وزیر داخلہ کے خلاف توہین عدالت کیس کو اسٹیل ملز کیس سے الگ کردیا گیا ہے۔