کابینہ کی دفاعی کمیٹی اجلاس

کابینہ کی دفاعی کمیٹی اجلاس

اسلام آباد(سی ایم لنکس) کابینہ کی دفاعی کمیٹی کا اجلاس اسلام آباد میں شروع ہوگیا ۔اجلاس کی صدارت وزیرا عظم گیلانی کررہے ہیں۔ اجلاس کے ایجنڈے میں سلالہ حملوں پر معافی کا معاملہ، ڈرون حملوں کی بندش، قبائلی علاقوں میں شرپسندوں کے خلاف کارروائی، اور نیٹو سپلائی کی بحالی اور سیکورٹی پر وصولی کی رقم شامل ہیں۔پہلے سفارتی ذرائع نے آج نیوز کو بتایا تھا کہ باضابطہ اعلان صدر آصف علی زرداری کی طرف سے شکاگو کانفرنس میں ہونے کا امکان ہے۔حکومت اور سفارتی ذرائع نے بتایا کہ امریکہ نے پاکستان کو نیٹو سپلائی لائن کھولنے کے لیے پندرہ مئی تک مہلت دے رکھی ہے، پاکستان نے سفارتی ذرائع کے ذریعے امریکہ کو آگاہ کر دیا ہے کہ نیٹو سپلائی لائن کھولنے کا فیصلہ کر لیا گیا ہے۔ امریکہ نے قبائلی علاقوں میں غیر اعلانیہ ڈرون حملے بند کرنے کا بھی عندیہ دیدیا ہے۔ پاکستان نے قبائلی علاقوں میں بھی غیر ملکی شرپسندوں کے خلاف کارروائی کا فیصلہ بھی کیا ہے۔ حکومتی ذرائع نے یہ بھی بتایا کہ نیٹو کے رکن ممالک نے یہ یقین دہانی بھی کروائی ہے کہ آئندہ سلالہ جیسے واقعہ کی روک تھام کے لیے امریکہ پر دباوٴ ڈالا جائے گا۔ نیٹو ممالک نے بھی نیٹو سلائی لائن جلد نہ کھولنے کی صورت میں سخت اقدامات اٹھانے کے حوالے سے پاکستان کو باضابطہ خبردار کیا تھا۔ حکومتی ذرائع نے کابینہ کی دفاعی کمیٹی کے آج ہونے والے اجلاس کے حوالے سے بتایا کہ ایجنڈے میں چار نکات شامل ہیں۔ جس میں سلالہ حملوں پر معافی کا معاملہ، ڈرون حملوں کی بندش، قبائلی علاقوں میں شرپسندوں کے خلاف کارروائی، اور نیٹو سپلائی کی بحالی اور سیکورٹی پر وصولی کی رقم شامل ہیں۔