راولپنڈی: مسافر طیارہ گر کر تباہ، تمام 127 مسافر جاں بحق

راولپنڈی: مسافر طیارہ گر کر تباہ، تمام 127 مسافر جاں بحق

راولپنڈی(سی ایم لنکس)چکلالہ ائر پورٹ کے قریب بھوجا ائر لائن کا مسافر بردار طیارہ گر کر تباہ ہو گیا ہے، جس میں تمام افراد جان بحق ہو گئے۔ طیارے میں عملے کے 9 ارکان اور 118مسافر سوار تھے۔ طیارہ کراچی سے اسلام آباد جا رہا تھا کہ راولپنڈی کے قریب حسین عباس گائوں کے علاقے میں گر کر تباہ ہو گیا۔ امدادی ٹیمیں جائے حادثہ پر پہنچ گئی ہیں۔ ذرائع کے مطابق طیارہ خراب  موسم کے باعث گرا، پائلٹ کا کنٹرول ٹاور سے چھ بجکر چالیس منٹ پر رابطہ منقطع ہو گیا تھا۔ کنٹرول ٹاور نے طیارے کو لینڈنگ کی اجازت دے دی تھی لیکن جہاز ائر پورٹ پر لینڈنگ سے قبل ہی گر کر تباہ ہوگیا۔ طیارہ بوئنگ 737 تھا طیارے کا فلائٹ نمبر بی فور 213 تھا اور یہ 27 سال چار ماہ پرانا جہاز تھا۔ طیارہ کراچی سے شام پانچ بجے روانہ ہوا۔ دوبارہ پروازیں شروع کرنے کی اجازت حاصل کرنے کے بعد بھوجا ائر لائن کی یہ پہلی پرواز تھی۔ اس پرواز کو صبح روانہ ہونا تھا لیکن یہ شام پانچ بجے آپریٹ کی گئی۔ سول ایوی ایشن کے مطابق طیارہ ملبے کا ڈھیر بن گیا ہے اور ملبے میں کسی زخمی کے ملنے کے امکانات نہیں ہیں۔ بھوجا انتظامیہ کے مطابق تمام مسافر اور عملے کے ارکان حادثے میں جاں بحق ہو چکے ہیں۔ اسلام آباد اور راولپنڈی کے اسپتالوں میں ایمرجنسی نافذ کر دی گئی ہے اور تمام عملے کو طلب کر لیا گیا ہے۔ وزارت دفاع نے حادثے کی تحقیقات کا حکم دے دیا ہے۔ طیارہ کو کیپٹن نوراللہ آفریدی اور معاون پائلٹ مشتاق اڑا رہے تھے۔ سول ایوی ایشن اتھارٹی نے اسلام آباد اور کراچی ائرپورٹ پر معلومات کے کاوئنٹر قائم کر دیے ہیں۔